Златото годинава постигна дури и подобри резултати од американскиот индекс S&P 500. Еден од најпопуларните начини за инвестирање во злато е купувањето физичко инвестициско злато, кое се нуди во форма на златни прачки и златници.
Што се случува со цената на златото?
Пред да навлеземе во спецификите на златниците, важно е да ги разбереме основите на она што ја поттикнуваше цената на златото во изминатите години. Инвестициското злато се смета за една од најсигурните инвестиции, како за приватните инвеститори, така и за централните банки. Според истражување на американскиот фонд Invesco од минатата година, 96% од централните банки го сметаат златото за „безбедно засолниште“ средство (safe-haven asset).
Цената на златото добро реагира во периоди на кризи, инфлација, геополитички тензии, и токму поради тоа многу инвеститори се обраќаат кон златото во нестабилни времиња. Ова е еден од главните фактори што ја поттикнува цената на златото. Некои од моменталните фактори кои придонесуваат за овој нагорен тренд на златото се:
- Инфлација – предизвикана од кредитна експанзија и печатење пари; во последните години светот се соочува со висока инфлација.
- Воени конфликти во Украина и Газа – по почетокот на двата конфликта, цената на златото значително порасна.
- Намалување на каматните стапки – одлуките на Федералните резерви, Европската централна банка и Банката на Англија за намалување на каматните стапки повторно го враќаат стравот од инфлација.
- Геополитички тензии – трговската војна меѓу Америка и Кина, растечките дипломатски тензии и обидот на БРИКС да ја забрза де-доларизацијата (со ограничен успех).
- Економска стагнација – Германија бележи втора година рецесија, пазарот на труд во Америка е слаб, а инфлацијата е сè уште над таргетот во повеќето развиени земји.
Сите овие фактори и неизвесности ги тераат инвеститорите да се насочат кон сигурни пристаништа, како што е златото.
Физичко инвестициско злато
Сега кога разгледавме некои од факторите кои влијаат на цената на златото, можеме да се осврнеме на еден од најпопуларните начини за инвестирање во злато – физичкото инвестициско злато.
Инвестициското злато се нуди во две форми – прачки и монети. Златните прачки се поедноставни и претставуваат одредена количина злато добиена со леење или ковачки процес, со чистота еднаква или поголема од 0.995 (23,88 карати).
Извор: Unsplash
Инвестициски златници
Кога станува збор за инвестициските златници, постојат неколку дополнителни критериуми. За еден златник да се смета за инвестициски, мора да ги исполнува следниве услови:
- Да биде искован (произведен) по 1800 година;
- Да е или бил законско средство за плаќање во земјата од која потекнува;
- Да има чистота од минимум 0.900 (21,6 карати);
- Да се продава по цена која не е повеќе од 80% повисока од спот цената на златото кое го содржи.
Повеќето од овие монети се произведуваат од националните ковачници на земјите од кои потекнуваат. Примери се Кралската ковачница на монети од Британија, Perth Mint од Австралија или Австриската ковачница.
Австриската ковачница, на пример, го произведува златникот Виенска филхармонија, кој има номинална вредност од 100 евра и е законско средство за плаќање во Република Австрија. Сепак, количината на злато што ја содржи овој златник е многу повредна од номиналната вредност. Некои од најпопуларните златници во светот се: Дукат Франц Јозеф, Виенска филхармонија (Австрија), Кругеранд (Јужна Африка), Канадски јаворов лист, Австралиски кенгур, Британскиот Суверен.
Сите овие златници се многу популарни и многу од нив потекнуваат од времето на златниот стандард, кога валутите беа поткрепени со злато. И денес тие се многу популарни инвестиции и меѓу најдобрите чувари на вредноста. Инвеститорите често ги претпочитаат златниците пред прачките поради нивната елеганција, историја и уметничка вредност. Иако кованиците се малку поскапи од прачките со иста тежина, инвеститорите ги купуваат бидејќи се препознатливи низ целиот свет. На пример, Виенската филхармонија е еден од најпродаваните златници насекаде во светот.
Во која било држава да се најдете, овој златник е препознатлив и лесно може да се продаде по цена блиска до спот цената на златото.
Извор: Bizlife.rs
